لاہور کے مدرسے جامعہ منظور الاسلامیہ میں ایک طالب علم صابر کے ساتھ مفتی عزیز الرحمان کی ریپ کی ویڈیو وائرل ہوئی ہے۔
ویڈیو میں ابتدائی طور پر ریپ کے مناظر کے بعد طالب علم صابر کہہ رہا ہے کہ اسے بلیک میل کیا جا رہا ہے اور جان سے مارنے کی دھمکی دی جا رہی ہے۔ اس نے مزید کہا کہ اس نے سب سے بات کی ہے لیکن نہ تو اسے انصاف ملا ہے اور نہ ہی کسی نے اس کی بات سنی ہے جبکہ اس نے سب سے بات کی ہے تو اس کا آخری فیصلہ ہے کہ وہ خودکشی کر رہا ہے کیونکہ انہوں نے اسے جان سے مارنا ہے تو اس سے اچھا ہے کہ وہ خودکشی کر لے۔
مدرسے کے ناظم خلیل اللہ ابراہیم نے ایک ویڈیو پیغام میں کہا ہے کہ صابر نامی لڑکا ان کے پاس کچھ عرصے پہلے آیا تھا اور اس نے مفتی کی شکایت کی تھی لیکن خلیل اللہ ابراہیم کو لڑکے کی بات پر یقین نہیں تھا، تو کچھ عرصے بعد وہ ان کے پاس ویڈیو لے آیا، تو خلیل اللہ ابراہیم نے تحقیق کی تو یہ واقعہ ہوا تھا تو مفتی کو فارغ کر دیا گیا اور اب مفتی کا جامعہ منظور الاسلامیہ سے کوئی تعلق نہیں ہے۔
https://twitter.com/FarooquiJameel/status/1404849215533113347
دوسری طرف جمیل فاروقی نے مدرسے کی جانب سے جاری کیا ہوا ایک خط ٹویٹ کیا اور اس ٹویٹ میں لکھا ”صرف ایک ٹویٹ کے ذریعے ایکسپوز کرنے بعد جامعہ منظور الاسلام نے مفتی عزیر الرحمن کو ایسا فارغ کیا کہ نوٹس کو 12 دن پیچھے لے گئے مطلب اتنی بھی رواداری نہیں رکھی کہ نوٹس آج کی تاریخ کا جاری کیا جاتا۔ لیکن جملوں کی سختی سے اندازہ لگائیں کہ مدرسے کو اندازہ ہے کہ ردعمل سخت آنے والا ہے“
https://twitter.com/FarooquiJameel/status/1404853219633868805
مدرسے کی جانب سے مبینہ طور جاری کردہ اس خط میں مفتی عزیز الرحمان کو مخاطب کرتے ہوئے لکھا ہے کہ
”مسمی مفتی عزیز الرحمن صاحب
آپ کے متعلق طالب علم کے ساتھ بدفعلی کی نازیبا ویڈیو لے کر رات بارہ بجے محلے کچھ لوگ آئے جو آپ کے گھر بھی آئے اور انہوں نے آپ کے بیٹے کو یہاں چلے جانے کا میسج دیا اور ان کی شکایت کی بنیاد پر ادارہ نے اپنی انتظامیہ کی مشاورت کی اور انتظامیہ کے متفقہ فیصلے کے بعد آپ کو آج مورخہ 03۔ 06۔ 2021 کو ادارے سے فارغ کیا جاتا ہے۔ آپ یہاں سے اپنا سامان اٹھا کر چلے جائیں اور آج سے ادارہ آپ کے کسی قول و فعل اور آپ کے اس عمل سے مکمل برات کا اعلان کرتا اور۔ آپ اپنے ذاتی فعل کے خود ذمہ دار ہیں۔ جاری کردہ (مولانا) اسد اللہ فاروق، مہتمم جامعہ منظور الاسلامیہ لاہور کینٹ ”
دوسری جانب وفاق المدارس العربیہ نے بھی ایک نوٹیفیکیشن کے ذریعے مفتی عزیز الرحمن کو اپنی شوریٰ سے نکالنے کا اعلان بھی کر دیا ہے۔
تازہ ترین اطلاعات کے مطابق مفتی عزیز الرحمن نے ایک ویڈیو جاری کرتے ہوئے کہا ہے کہ یہ ویڈیو اڈھائی سال پرانی ہے اور انہیں چائے میں نشہ آور چیز ملا کر پلائی گئی جس سے وہ اپنے ہوش وحواس میں نہیں رہ سکے۔ یہ پلانٹڈ ویڈیو ہے جس کا مقصد ان کو بدنام کرنا ہے۔