پاکستان میں ٹوئٹر پر ہیش ٹیگ کوک سٹوڈیو اور پاکستانی گلوکار علی سیٹھی کا نام ٹرینڈ کرتا رہا جس کی وجہ اس پروگرام کے حالیہ سیزن میں علی سیٹھی کی پرفارمنس تھی۔
علی سیٹھی نے کوک سٹوڈیو کے رواں سیزن میں عالمی شہرت یافتہ غزل گائیک مہدی حسن کی مشہور عزل ’گلوں میں رنگ بھرے‘ پر جب پرفارمنس دی تو سوشل میڈیا صارفین خود پر قابو نہ رکھ سکے۔
کسی نے علی سیٹھی کی تعریف کے پل باندھے تو کئی لوگ شہنشا ہ غزل مہدی حسن کی اس مشہور غزل پر علی سیٹھی کی پرفارمنس پر ناراض دکھائی دیے۔
واضح رہے کہ اس سے قبل کوک سٹوڈیو کے دسویں سیزن میں بھی علی سیٹھی نے مہدی حسن کی غزل ’رنجش ہی سہی‘ پر پرفارمنس دی تھی جسے کافی سراہا گیا تھا۔
ساجد نامی ایک صارف نے لکھا ’ علی سیٹھی نے محفل لوٹ لی۔ وہ کوک سٹوڈیو 2019 کے فاتح ہیں۔‘
ابراہیم نامی صارف نے علی سیٹھی کے والد نجم سیٹھی کا ذکر کرتے ہوئے لکھا ’ نجم سیٹھی نے پی ایس ایل کے بعد پاکستان کو سب سے بہترین چیز علی سیٹھی کی شکل میں دی ہے۔‘
صحافی آصف خان نے لکھا ’ علی سیٹھی کا گانا ایک تحفہ ہیں۔ بہترین بات یہ ہے کہ انھوں نے مہدی حسن کو نقل کرنے کی کوشش نہیں بلکہ اس مشہور عزل میں اپنا رنگ بھرا ہے۔‘
لیکن اتنی تعریفوں کے بیج بہت سے لوگ ایسے بھی ہیں جو علی سیٹھی کی اس پرفارمنس سے مطمئن نہیں۔
تاریخ دان علی عثمان قاسمی نے لکھا ’گلوں میں رنگ بھرے میں ’بھرے‘ کا ’بھ‘ کچھ بھرا بھرا نہیں لگ رہا۔‘
پاکستان کے ایک نجی ٹی وی چینل سے وابستہ نیوز اینکر نے عرزا خان نے لکھا’ میرے شوہر نے یہ غزل علی سیٹھی سے بہتر گائی ہے۔‘
ایک اور صارف آمنہ احمد نے بھی علی سیٹھی کے تلفظ کے بارے میں لکھا ’ علی سیٹھی اچھے ہیں لیکن یہ قفس ہے کفس نہیں۔‘