بالی وڈ ایکٹر، پروڈیوسر اور ڈائریکٹر فرحان اختر اور ماڈل اور ایکٹریس شبانی ڈنڈیکر کی شادی ہوگئی۔ دونوں 19 فروری کی دوپہر کو شادی کے بندھن میں بندھے۔
شادی میں دونوں پریمیوں کے انتہائی قریبی دوستوں اور رشتے داروں نے شرکت کی۔ شادی کے موقع پر شبانی ڈنڈیکر نےسرخ رنگ کاعروسی جوڑا پہن رکھا تھا جبکہ فرحان اختر سیاہ لباس میں ملبوس تھے۔
شادی کی تمام تقریبات ممبئی کےعلاقے کھنڈالا میں واقع جاوید اختر اور شبانہ اعظمی کے فارم ہاؤس پر ہوئیں۔ دونوں نے مسیحیوں سے ملتے جلتے طریقے سے شادی کی۔
فرحان اختر اور شبانی ڈنڈیکر نے سب کے سامنے ایک دوسرے کو قبول کرنے کا اقرار کیا۔ شادی کی تصویریں اور ویڈیوز سوشل میڈیا پر وائرل ہو گئیں۔
ان ویڈیوز اور تصاویر میں فرحان اختر اور شبانی ڈنڈیکر نہایت خوش دکھائی دیے اور مسکراتے ہوئے دوستوں اور رشتے داروں کو گلے لگاتے رہے۔ شادی میں ہریتک روشن، راکیش روشن، راکیش اوم پرکاش مہرا، امریتا اروڑا ، ستیش کوشک، ثاقب سلیم اور سمیر کوچر نے شرکت کی۔
اس سے پہلے دونوں کی مہندی کی تقریب ہوئی جس میں دلہا، دلہن کے مہمانوں کے درمیان ڈانس مقابلہ ہوا۔ ریا چکرورتی نے مشہور انڈین گانے ’مہندی لگا کے رکھنا‘ پر ڈانس کیا۔
ریا چکرورتی کے ڈانس کی یہ ویڈیو بہت وائرل ہوئی۔’مہندی لگا کے رکھنا‘ پر ریا چکرورتی کے ساتھ ساتھ دلہن کی بہنوں اور دوستوں نے بھی ڈانس کیا۔
خبریں ہیں کہ دونوں اب 21 فروری کو اپنی شادی رجسٹر کرائیں گے۔ یہ وہی دن ہوگا جب دونوں کے ایک دوسرے سے تعلقات قائم ہوئے تھے۔ یہ بھی اطلاعات ہیں کہ اس کے بعد دونوں ہندو مذہب کے تحت بھی شادی کریں گے۔ شبانی ڈنڈیکر کی یہ پہلی جبکہ فرحان اختر کی دوسری شادی ہے۔ شبانی ڈنڈیکر 2018 میں فرحان اختر کی گرل فرینڈ بنی تھیں۔
