انٹرنیٹ براؤزر مائیکروسافٹ ایج پر یوٹیوب سمیت مختلف ویب سائٹس کی ویڈیوز کو مختلف زبانوں میں ترجمہ کرنے کے فیچر کی آزمائش شروع کردی گئی۔ یہ فیچر یوٹیوب، لنکڈ ان اور دیگر متعدد ویب سائٹس پر استعمال کیا جاسکے گا۔
مائیکرو سافٹ کی جانب سے جاری کردہ بیان کے مطابق آرٹیفیشل انٹیلی جنس (اے آئی) کی مدد سے یوٹیوب، لنکڈن اور کرسرا سمیت دیگر ویب سائٹس پر دیکھی جانے والی ویڈیوز پر ترجمہ کرنے کی آزمائش شروع کردی گئی۔
فوری طور پر انگریزی سے ہسپانوی اور ہسپانوی سے انگریزی زبان کے ترجمے کی آزمائش شروع کردی گئی جب کہ ترتیب وار اس میں دیگر زبانوں میں بھی ترجمے کو شامل کیا جائے گا۔
کمپنی کے مطابق مستقبل میں مائیکروسافٹ ایج کے براؤزر پر ٹرانسلیشن کا اے آئی ٹول شامل کیا جائے گا، جس پر کلک کرکے صارفین ویڈیوز کو اپنی پسندیدہ زبان میں سن سکیں گے۔
تازہ ترین خبروں اور تجزیوں کے لیے نیا دور کا وٹس ایپ چینل جائن کریں
کمپنی کی جانب سے جاری کردہ ویڈیو میں دیکھا جا سکتا ہے کہ لنکڈاِن پر دیکھی جانے والی ویڈیو کو ترجمہ کرنے کے آپشن پر کلک کرنے کے بعد ویڈیو کی آواز دوسری زبان میں تبدیل ہوگئی۔
فیچر کے تحت اگر صارفین کسی بھی انگریزی کی ویڈیو کو دوسری زبان میں سننا پسند کریں گے تو وہ صرف ٹرانسلیشن کے فیچر میں جاکر زبان منتخب کریں گے اور چلنے والی ویڈیو خود بخود ترجمے کی آواز میں چلنا شروع ہوگی اور آواز بھی اسی شخص کی ہوگی جو کہ اصلی ویڈیو میں موجود ہوگی۔
اس فیچر کے تحت مائیکرو سافٹ ایج پر یوٹیوب سمیت دیگر ویب سائٹس کی ویڈیوز کو براہ راست ترجمہ کرکے سنا جا سکے گا۔
خیال ظاہر کیا جا رہا ہے کہ مستقبل میں مائیکرو سافٹ بڑی ویب سائٹس جیسا کہ فیس بک، انسٹاگرام اور ٹک ٹاک سمیت دوسری ویب سائٹس کی ویڈیوز کو بھی ترجمہ کرکے سننے کا فیچر پیش کرے گا۔