فیصل آباد کے نواحی علاقے میں دو بہنوں کو اغواء کرکے انہیں مبینہ طور پر اجتماعی زیادتی کا نشانہ بنا دیا گیا۔ مقدمہ متاثرہ لڑکیوں کی والدہ کی درخواست پر درج کیا گیا جس میں کہا گیا ہے کہ دونوں بیٹیوں کو 11 ستمبر کو گھر سے اغواء کیا گیا اور نشہ آور مشروب پلا کر اجتماعی زیادتی کا نشانہ بنا یا گیا۔
ایف آئی آر کے متن کے مطابق تین ملزمان نے بڑی بہن کو فیصل آباد کے ایک مکان میں رکھ کر جب کہ دو ملزمان نے چھوٹی بہن کو گوجرانوالا لے جا کر اجتماعی زیادتی کا نشانہ بنایا اور ویڈیوز بناتے رہے۔
لڑکیوں کی والدہ نے بتایا کہ ان کی بالائی منزل پر رہائش پذیر افراد نے دونوں بہنوں کے اغواء میں مدد کی۔ پولیس نے لڑکیوں کے اغواء اور مبینہ زیادتی میں ملوث ہونے کے الزام میں 3 خواتین سمیت 15 افراد کے خلاف مقدمہ درج کرلیا۔ پولیس ترجمان منیب احسن کا کہنا ہے کہ لڑکیوں کا میڈیکل کروا لیا گیا ہے جب کہ رپورٹ آنے پر کارروائی کو آگے بڑھایا جائے گا۔
پولیس کے مطابق دونوں لڑکیاں 11 ستمبر کو اغوا ہوئیں اور اہل خانہ نے کارروائی کیلئے چند روز قبل درخواست دی، واقعے کی تحقیقات جاری ہیں تاہم اب تک کسی ملزم کو گرفتار نہیں کیا جاسکا۔