یونیورسٹی آف انجینئرنگ اینڈ ٹیکنالوجی لاہور کے نوٹیفکیشن میں طلبہ کو خصوصی نوٹ لکھ کر بتایا گیا کہ وہ (عالمی وبا سے) اپنی صحت کا خیال خود رکھیں، یونیورسٹی اس کی ذمہ دار نہیں ہوگی۔
اس حوالے سے سماجی کارکن اور طلبہ کے حقوق کے لیے آواز بلند کرنے والے عمار علی جان نے اپنی ٹویٹ میں یونیورسٹی آف انجینئرنگ اینڈ ٹیکنالوجی لاہور کی جانب سے طلبہ کے لیے جاری کیا گیا نوٹس شئیر کرتے ہوئے لکھا کہ کیا یہ قانونی بھی ہے؟
Notice served by UET to students. See the note where it states that students attending university will be responsible for their own well-being without any liability on the part of the administration. Is this even legal?#StudentsLivesMatter #SayNoToCampusExam pic.twitter.com/XCUAxASwnf
— Ammar Ali Jan (@ammaralijan) August 4, 2020
خیال رہے کہ پنجاب بھر میں پرائیویٹ اور سرکاری تعلیمی ادارے کھولنے کے نئے ایس او پیز تیار کر لیے گئے ہیں۔ وزارت تعلیم نے صوبہ بھر میں پرائیویٹ اور سرکاری تعلیمی ادارے کھولنے کے نئے سخت اور فول پروف کرونا بچاؤ ایس او پیز تیار کیے ہیں۔
دوسری جانب این سی اوسی کے مطابق گذشتہ 24 گھنٹوں میں 432 نئے کیسز رپورٹ ہوئے اور 15 اموات ہوئیں جس کے بعد ملک بھر میں کرونا وائرس کے مریضوں کی تعداد 2 لاکھ 80 ہزار461 تک جا پہنچی جب کہ صحتیاب ہونے والے مریضوں کی تعداد دو لاکھ 49 ہزار397 ہوگئی ہے۔