نیا دور نیوز ڈیسک:۔
ورلڈ اکنامک فورم (ڈبلیوای ایف) نے گلوبل رسک رپورٹ 2025 جاری کر دی ہے، جس میں کہا گیا ہے کہ چیلنجز کے باوجود پاکستان معاشی استحکام کی جانب جارہا ہے۔
نیا دور نیوز ڈیسک کے مطابق ورلڈ اکنامک فورم کی رپورٹ میں کہا گیا ہے کہ پاکستان نے کڑے چیلنجز کے باوجود درست اقدامات کی بدولت معاشی کامیابیاں حاصل کیں، خطے میں ہتھیاروں کی دوڑ کے باوجود پاکستان کی محتاط سوچ لائق تحسین ہے۔
گلوبل رسک رپورٹ میں کہا گیا ہے کہ دنیا بھر میں فوجی بجٹ میں اضافہ ہوا لیکن پاکستان اسلحہ کی دوڑ کا حصہ دار نہیں بنا، پاکستان نے مہنگائی میں کمی، معاشی استحکام، روپے کی قدر میں بہتری اور قرض کی بہتر انتظام کاری کے شعبوں میں نمایاں بہتری دکھائی۔
رپورٹ میں کہا گیا ہے کہ پاکستان ماحولیاتی طور پر سب سے زیادہ متاثر ممالک میں سے ایک ہے، جہاں بار بار آنے والے سیلاب، ہیٹ ویوز اور پانی کی قلت جیسے عوامل خوراک کی سلامتی، بنیادی ڈھانچے کی استحکام اور لوگوں کے روزگار کے لیے خطرہ ہیں۔
ورلڈ اکنامک فورم کی رپورٹ میں پاکستان میں بڑھتے ہوئے سیاسی اور سماجی پولرائزیشن پر بھی روشنی ڈالی گئی ہے۔عالمی اقتصادی فورم کی رپورٹ میں بڑھتے ہوئے جغرافیائی سیاسی تنازعات، بگڑتے ہوئے معاشی عدم استحکام اور ماحولیاتی بحرانوں کو بھی اجاگر کیا گیا۔
اس رپورٹ میں کہا گیا ہے کہ دیگر ترقی پذیر معیشتوں کی طرح پاکستان کو بھی پیچیدہ خطرات کا سامنا ہے، جن سے نمٹنے کے لیے اسٹریٹجک لچک اور پالیسی میں جدت ضروری ہے۔
گلوبل رسک رپورٹ میں خبردار کیا گیا ہے کہ مہنگائی، کرنسی کی قدر میں کمی اور بڑھتے ہوئے قرضوں کے بوجھ سے پاکستان کی معیشت کمزور ہو سکتی ہے۔تاہم رپورٹ میں کہا گیا ہے کہ جدت کو فروغ دینے، گورننس کو مضبوط بنانے اور علاقائی تعاون کو بڑھا کر پاکستان مزید استحکام حاصل کرنے کی صلاحیت رکھتا ہے۔