اینٹی کرپشن پنجاب نے ایک کمرشل پلاٹ کی غیر قانونی الاٹمنٹ کے الزام میں سابق وزیراعظم عمران خان کی اہلیہ بشریٰ بی بی کی قریبی دوست فرحت شہزادی العروف فرح گوگی کی لاہور میں رہائشگاہ پر چھاپہ مارا ہے۔
حکام کی جانب سے کہا گیا ہے کہ ایک جعلی کمپنی بنا کر فیصل آباد میں کروڑوں روپے کا مہنگا اور کمرشل پلاٹ صرف 8 کروڑ روپے میں حاصل کرنے میں ملوث ہونے پر فرح گوگی کے گھر پر چھاپہ مارنے کی کارروائی عمل میں لائی گئی تھی۔
خیال رہے کہ اے سی ای نے درج کیس میں فرح گوگی، اس کی والدہ بشریٰ خان اور فیصل آباد انڈسٹریل سٹیٹ ڈیویلپمنٹ اینڈ مینجمنٹ کے کچھ افسروں کو نامزد کیا ہے۔ فرح خان گذشتہ تین ماہ سے یو اے ای میں موجود ہیں۔
حکام فرح گوگی اور ان کے خاوند کی جائیدادوں کی تحقیقات کر رہے ہیں۔ اس کیس میں انڈسٹریل سٹیٹ فیصل آباد کے 2 اہلکاروں کو گرفتار بھی کیا گیا ہے۔
دوسری جانب احتساب بیورو (نیب) لاہور نے فرح خان کو آمدن سے زائد اثاثوں اور منی لانڈرنگ کی تحقیقات کے سلسلے میں 20 جولائی کو طلب کر لیا ہے۔ جبکہ نیب نے اس تفتیش میں ان کے شوہر احسن جمیل اور دیگر 18 افراد کو بھی طلب کر رکھا ہے۔
