افریقی ملک نائجیریا کی سیکیورٹی فورسز نے کرونا وائرس کی روک تھام کے لیے اقدامات پر عمل درآمد کرانے کے دوران 18 افراد کو ہلاک کر دیا۔
غیر ملکی خبر رساں ایجنسی کے مطابق نائجیریا کے انسانی حقوق کے ادارے نے دعویٰ کیا ہے کہ ملک میں سیکیورٹی فورسز کے ہاتھوں ہلاک ہونے والوں کی تعداد کرونا وائرس کے باعث ہلاک ہونے والوں سے بھی زیادہ ہے۔
سرکاری اعداد و شمار کے مطابق نائجیریا میں کرونا وائرس سے اب تک 407 افراد متاثر اور 12 ہلاک ہوئے ہیں۔ لاک ڈاؤن اور پابندیوں پر عملدرآمد کے لیے پولیس اور آرمی سمیت سیکیورٹی فورسز تعینات کی گئی ہیں جس کے باعث ملک کی چند ریاستوں میں خونریز تصادم اور جھڑپیں بھی سامنے آئی ہیں۔
ملک میں انسانی حقوق کے قومی کمیشن کا کہنا ہے کہ اسے نائجیریا کے دارالحکومت ابوجا اور 36 ریاستوں میں سے 24 میں سیکیورٹی فورسز کی جانب سے انسانی حقوق کی پامالیوں کی 105 شکایات موصول ہوئی ہیں۔
کمیشن نے کہا کہ ان شکایات میں سے ماورائے عدالت قتل کے 8 دستاویزی واقعات سامنے آئے ہیں جن میں 18 افراد ہلاک ہوئے۔
بیان میں کہا گیا کہ کرونا وائرس سے سرکاری اعداد و شمار کے مطابق 12 اموات ہوئیں جبکہ قانون نافذ کرنے والے اداروں کے اہلکاروں نے قواعد و ضوابط پر عملدرآمد کے دوران ماورائے عدالت 18 افراد کو ہلاک کیا۔
کمیشن نے سیکیورٹی اہلکاروں پر طاقت کا بے جا اور نامناسب استعمال، اختیارات کے ناجائز استعمال، کرپشن اور ملکی و غیر ملکی قوانین کی خلاف ورزی کے الزامات عائد کیے۔
