اسلام آباد پولیس کے ایس پی ملک نعیم کے مطابق علاقہ چک شہزاد میں واقع فارم ہاؤس میں رات گئے نامعلوم افراد داخل ہوئے اور اہل خانہ کو 2 گھنٹے تک یرغمال بنائے رکھا۔
نامعلوم ملزمان نے فارم ہاؤس میں گھس کر اسلحہ کے زور پر اہل خانہ کو ایک کمرے میں بند کردیا اور ان کے موبائل فون بھی چھین کر باہر رابطہ کرنے کے ذرائع بند کر دیے۔ اس کے بعد ملزمان نے عمارت کا کونہ کونہ چھان مارا اور آخر میں نقدی لے کر وہاں سے نکل گئے۔
ایس پی ملک نعیم کے مطابق اکرم شیخ ایڈووکیٹ بھی فارم ہاؤس میں موجود تھے۔
واقعے کا مقدمہ فوری طور پر درج نہ ہوسکا جبکہ اکرم شیخ نے بھی تاحال کوئی بیان نہیں دیا۔
اسی حوالے سے سینئر صحافی حامد میر نے ٹویٹ کیا ہے کہ نامعلوم افراد نے دو گھنٹے تک اکرم شیخ کو یرغمال بنائے رکھا، ڈاکو اکرم شیخ کے گھر کی تلاشی لیتے رہے۔
حامد میر نے مزید کہا کہ مسلح افراد نے جاتے ہوئے اکرم شیخ کو دھمکی دی کہ "باز نہ آئے تو پھر آئیں گے"۔
Shocking news:Unknown people entered in the home of senior lawyer Akram Sheikh this morning he was held hostage for more than 2 hours they searched his home thoroughly robbed him and said “baz na aye tu phir aaingey”Sheikh was prosecutor in treason case against Pervez Musharraf
— Hamid Mir (@HamidMirPAK) December 21, 2019
یاد رہے کہ اکرم شیخ ایڈووکیٹ کو میاں نواز شریف نے پرویز مشرف کے خلاف مقدمہ کی پیروی کرنے والے پراسیکیوٹرز کی ٹیم کا سربراہ مقرر کیا تھا۔ انہوں نے 2018 تک مقدمہ لڑا مگر تحریک انصاف کے اقتدار میں آنے کے بعد استعفیٰ دے دیا تھا۔