راہول گاندھی کو مقبوضہ کشمیر جانے سے کیوں منع کیا جا رہا ہے؟

بھارت میں اپوزیشن جماعت کانگریس کے رہنما راہول گاندھی اور غلام نبی آزاد مقبوضہ کشمیر کا دورہ کر رہے ہیں۔ اپنے اس دورے میں وہ مقبوضہ کشمیر میں زیر حراست سیاسی رہنماؤں سے ملیں گے اور مقبوضہ کشمیر کے عوام سے اظہار یکجہتی کریں گے۔

مقبوضہ وادی کی قابض انتظامیہ کی جانب سے اپوزیشن رہنماؤں کو منع کیا گیا ہے کہ وہ وادی میں نہ آئیں اور ان سے تعاون کریں۔

قابض انتظامیہ نے مؤقف اختیار کیا ہے کہ اپوزیشن رہنماؤں کے دورے سے قانون کی خلاف ورزی ہو گی اور اس سے صورتحال خراب ہو سکتی ہے۔

Congress leader Rahul Gandhi onboard flight to Srinagar. A delegation of Opposition leaders, including Rahul Gandhi, are visiting Jammu & Kashmir today. pic.twitter.com/VMnquvE1WQ

— ANI (@ANI) August 24, 2019

خدشہ ظاہر کیا جا رہا ہے کہ راہول گاندھی اور غلام نبی آزاد کو سرینگر ائیر پورٹ پر روک لیا جائے گا اور آئین کے آرٹیکل 144 کی خلاف ورزی کی جانے کی وجہ سے دہلی واپس بھجوا دیا جائے۔

خیال رہے کہ بھارت نے 5 اگست کو مقبوضہ کشمیر کی خصوصی حیثیت سے متعلق آئین کا آرٹیکل 370 ختم کر کے وادی میں غیر معینہ مدت کے لیے کرفیو نافذ کر دیا تھا۔

بھارت کی ہندو انتہا پسند حکمران جماعت بی جے پی کے اس اقدام کے بعد سے ہی مقبوضہ وادی میں حالات انتہائی کشیدہ ہیں اور وادی میں مکمل لاک ڈاؤن ہے، حریت قیادت اور سیاسی رہنماؤں کو گرفتاریوں یا گھروں میں نظر بند کیا جا رہا ہے۔