دورہ امریکہ: عمران خان کا لباس اور ڈیزائنرز کے جھوٹے دعوے

وزیراعظم کا دورہ امریکہ تو ختم ہو گیا لیکن اس دورے کو لے کر نئی نئی خبریں سامنے آ رہی ہیں، ایسی ہی کچھ افواہیں دورہ امریکہ کے دوران وزیراعظم کے پُروقار لباس کے حوالے سے بھی پھیل رہی تھیں۔ سماجی رابطوں کی ویب سائٹ پر پاکستان کے مختلف ڈیزائنر کو وزیراعظم کے شاندار لباس کا کریڈٹ دیا جارہا تھا۔

افواہوں کے اس بازار میں کوئی صداقت نہیں اس بات کا انکشاف وزیراعظم کے معاون خصوصی زلفی بخاری نے اپنے ایک ٹویٹ میں کیا۔ زلفی بخاری نے لکھا کہ وزیراعظم عمران خان کے دورہ امریکا کے دوران زیب تن کیے جانے والے لباس کا کریڈٹ لینے والے ڈیزائنرز کے دعوے جھوٹے ہیں، وزیراعظم نے کبھی ڈیزائنر کپڑوں میں دلچسپی نہیں لی۔

زلفی بخاری نے مزید بتایا کہ وزیراعظم عمران خان کی سادہ شلوار قمیض کے بارے میں کیے جانے والے دعوے غلط ہیں کیونکہ خاتون اول بشریٰ بی بی خود عمران خان کے لئے کپڑے خریدتی ہیں اور مقامی درزی سے سلواتی ہیں۔ لہذا وہ تمام لوگ جو وزیراعظم کے لباس کا کریڈٹ لے رہے ہیں وہ نہ صرف جھوٹے ہیں بلکہ دھوکے باز بھی ہیں۔

The PM has never been interested in designers or worn them. Especially for his simple shalwar kameez. The First Lady bought all the cloth and got it stitched from a simple local tailor. Which ever designer is trying to claim credit for it is not only a liar but a cheat.

— Sayed Z Bukhari (@sayedzbukhari) July 24, 2019

خیال رہے کہ وزیراعظم عمران خان کے دورہ امریکا کے دوران زیب تن کیے جانے والے لباس کے خوب چرچے رہے، اپنے دورے کے دوران وزیراعظم نے گہرے نیلے رنگ کی شلوار قمیض اور ہم رنگ ویسٹ کوٹ زیب تن کیا تھا۔ اس لباس میں ان کی امریکی صدر ٹرمپ اورخاتون اول کے ساتھ تصاویر بھی سوشل میڈیا پر وائرل ہوئی تھیں۔

لباس کی اس مقبولیت کا فائدہ اٹھانے کے لیے مختلف لوگوں نے وزیراعظم کا لباس ڈیزائن کرنے کا دعویٰ کیا تھا۔