نعمان لنگڑیال نے پرویز الٰہی پر کروڑوں روپے کی رشوت دینے کی آفر کا الزام لگا دیا

پی ٹی آئی کے منحرف رکن اسمبلی نعمان لنگڑیال نے سپیکر پنجاب اسمبلی چودھری پرویز الٰہی پر رشوت دینے کی آفر کا الزام لگاتے ہوئے کہا ہے کہ انہوں نے مجھے 10 کروڑ کی پیشکش کی اور کہا کہ دوبارہ عمران خان کیساتھ مل جائو۔

خیال رہے کہ پی ٹی آئی کے منحرف رہنما نعمان لنگڑیال اب مسلم لیگ ن کے ٹکٹ پر پنجاب اسمبلی کے حلقے پی پی 202 سے ضمنی انتخابات میں حصہ لے رہے ہیں۔

تفصیل کے مطابق پاکستان تحریک انصاف کے منحرف سابق رکن پنجاب اسمبلی نعمان لنگڑیال نے بڑا الزام عائد کرتے ہوئے کہا ہے کہ چودھری پرویز الہٰی نے عمران خان کا ساتھ دینے اور دوبارہ ان کی جماعت میں واپسی کے لئے مجھے 10 کروڑ روپے کی آفر کی تھی۔

یہ انکشاف انہوں نے چیچہ وطنی میں ایک جلسے سے خطاب کرتے ہوئے کیا۔ ان کا کہنا تھا کہ ہمارے ساتھی محب وطن تھے جنہوں نے رقم کی پیش کش ٹھکرا دی۔ میں ان کو سلام پیش کرتا ہوں جو مشکل وقت میں جہانگیر ترین کیساتھ کھڑے رہے۔

نعمان لنگڑیال کا کہنا تھا کہ تحریک انصاف کے رہنما کہتے ہیں کہ ہم نے ضمیر کا سودا کیا۔ میں صوبائی وزیر تھا لیکن پی ٹی آئی میں جرات نہیں تھی کہ مجھے اس سے نکال سکتے۔

یہ بھی پڑھیں: چودھری وجاہت کے زرداری اور میرے بیٹوں پر الزامات انتہائی بیہودہ ہیں: چودھری شجاعت چھوٹے بھائی پر برس پڑے

دوسری جانب مسلم لیگ ق کے سربراہ چودھری شجاعت حسین نے اپنے چھوٹے بھائی چودھری وجاہت کے حالیہ بیان کی شدید مذمت کرتے ہوئے اسے الزم تراشی اور بیہودگی قرار دیدیا ہے۔

سماجی رابطوں کی ویب سائٹ ٹویٹر پر جاری اپنے بیان میں انہوں نے لکھا کہ میرے چھوٹے بھائی چودھری وجاہت حسین نے ہمارے گھر گجرات میں لوگوں سے چند باتیں کی ہیں۔ انہوں نے نیشنل لیول کے ایک بڑے لیڈر آصف علی زرداری کے متعلق الزام تراشی کی اور میرے بیٹوں پر الزام لگایا کہ انہوں نے ڈالر مانگے۔ اگر انہوں نے یہ باتیں کی ہیں تو یہ نہایت بیہودہ باتیں ہیں۔

ان کا کہنا تھا کہ میں نے اپنے بیٹوں کی ایسی تربیت نہیں کی۔ میرے کہنے پر میرے بچے فی الحال خاموش ہیں۔ میں نے ان کو تلقین کی ہوئی ہے کہ ہمیشہ سچ بولنا اور وعدے کا پاس رکھنا ہے۔ میرے کہنے پر ہی اپوزیشن کے متفقہ امیدوار وزیراعظم شہباز شریف کو ووٹ ڈالا تھا، ہم نے کسی سے کوئی وزارت نہیں مانگی۔

انہوں نے کہا کہ آصف علی زرداری نے خود آکر ہمیں مبارکباد دی تھی۔ چودھری وجاہت حسین نے یہ بھی کہا ہے کہ 30 جون تک اگر مسلم لیگ ن سے ہم نے اتحاد ختم نہ کیا تو وہ نئی جماعت بنا لیں گے۔ پاکستان میں پہلے بھی سینکڑوں پارٹیاں بنی ہوئی ہیں ایک اور بن جائے گی تو کیا فرق پڑے گا۔

چودھری شجاعت کا کہنا تھا کہ چودھری وجاہت نے یہ بھی کہا کہ سیکرٹری جنرل اور وفاقی وزیر طارق بشیر چیمہ نے ہمارے خاندان کو تقسیم کر دیا ہے۔ طارق بشیر چیمہ کے متعلق جو بیان دیا ہے وہ غیر اخلاقی اور جھوٹ پر مبنی ہے۔

مسلم لیگ ق کے لیڈر کے ٹویٹر اکائونٹ سے جاری بیان میں کہا گیا ہے کہ چودھری وجاہت نےالزام لگایا ہے کہ میرے بیٹے مانگے تانگے کے وزیر بنےہوئے ہیں اور ان کا کوئی حلقہ نہیں ہے۔ میں ان باتوں کا جواب کسی وقت گجرات جا کر گجرات والوں کے سامنے دوں گا اور بتاؤں گا کہ کس کا کون سا حلقہ ہے۔