اسلام آباد میں مندر کی تعمیر کے معاملے پر اسلامی نظریاتی کونسل نے اپنی رائے دیتے ہوئے سیدپور میں قائم مندر کھولنے کی سفارش کرتے ہوئے کہا کہ ہندو کمیونٹی کے لیے شمشان گھاٹ کے لیے جگہ فراہم کرنے اور مذہبی تہواروں کے لیے کمیونٹی سینٹر تعمیر کرنے کی اجازت ہے۔
اسلامی نظریاتی کونسل کے مطابق غیر سرکاری عبادت گاہوں کے لیے سرکاری فنڈ مختص کرنے کی حمایت نہیں کی جاسکتی لہذا بطور پاکستانی شہری حکومت ہندو کمیونٹی کی فلاح و بہبود کے لیے الگ سے رقم مختص کر سکتی ہے۔
یاد رہے کہ اسلام آباد میں ہندو برادری کے لیے مندر کی تعمیر مسئلہ بن گیا تھا جبکہ جامعہ اشرفیہ نے وفاقی دارالحکومت میں مندر کی تعمیر کو غیر شرعی قرار دیتے ہوئے فتویٰ جاری کر دیا۔
علاوہ ازیں اسلام آباد ہائی کورٹ نے وفاقی دارالحکومت میں مندر کی تعمیر کے خلاف درخواست پر کیپیٹل ڈیولپمنٹ اتھارٹی (سی ڈی اے) کو نوٹس جاری کرتے ہوئے جواب طلب کیا تھا۔ ادھر پرویز خٹک کو مندر کی افتتاحی تقریب میں شرکت کرنے پر انہیں شدید تنقید کا نشانہ بنایا گیا تھا۔
