عالمی عدالت انصاف کے فیصلے کو مدنظر رکھتے ہوئے پاکستان نے بھارت کو کلبھوشن یادیو تک قونصلر رسائی کی باضابطہ طور پر پیشکش کر دی ہے۔
دفتر خارجہ اسلام آباد میں ہفتہ وار میڈیا بریفنگ کے دوران ترجمان دفتر خارجہ محمد فیصل نے کہا کہ کلبھوشن یادیو کو قونصلررسائی دینے پر کام ہو رہا ہے، اس سلسلے میں عالمی عدالت کے فیصلے کے مطابق اقدامات کیے جا رہے ہیں، بھارت کو قونصلر رسائی سے متعلق جمعہ کو آگاہ کر دیا گیا ہے۔
یاد رہے کہ عالمی عدالت انصاف نے کلبھوشن یادیو کیس میں بھارتی درخواست پر فیصلہ سناتے ہوئے پاکستان کو ہدایت کی تھی کہ کلبھوشن یادیو کو قونصلر رسائی کا حق دیا جائے اور اس کی سزائے موت پر نظر ثانی کی جائے۔
