باوثوق ذرائع نے دی فرائیڈے ٹائمز کو تصدیق کی ہے کہ رواں سال 6 جون کو پنجاب اینٹی کرپشن اسٹیبلشمنٹ کو شیخوپورہ کے ڈپٹی کمشنر کے دفتر سے ایک ریفرنس موصول ہوا جس میں AFCO سٹیل ملز کے خلاف قانونی کارروائی کی درخواست کی گئی تھی، جس کی ملکیت حماد اظہر اور ان کے والد سابق گورنر پنجاب میاں اظہر تھے اور یہ فیکڑی شیخوپورہ ضلع فیروز والا کی تحصیل موضع خان پور نبی پور میں واقع ہے
انہوں نے مزید بتایا کہ اسسٹنٹ کمشنر فیروز والا نے دستاویز نمبر AC/F/537 مورخہ 7 جون کو اطلاع دی کہ AFCO سٹیل ملز فیروز والا ضلع کی تحصیل کوٹ عبدالمالک میں 135 کنال اور 12 مرلے کے رقبے پر کام کر رہی ہے جو سابق وفاقی وزیر حماد اظہر کی ملکیت ہے۔
کمرشلائزیشن فیس کی عدم ادائیگی
شیخوپورہ ڈسٹرکٹ کونسل اور فیروز والا میونسپل کمیٹی کے سینئر حکام نے TFT کو تصدیق کی کہ اس صنعتی ادارے کے لیے پلان یا نقشہ منظور نہیں ہوا تھا اور نہ ہی کمرشلائزیشن فیس ادا کی گئی تھی۔
انہوں نے مزید کہا کہ اس کے نتیجے میں قومی خزانے کو کروڑوں روپے کا بھاری مالی نقصان اٹھانا پڑا ہے۔ ان کی شکایت پر حماد اظہر کے خلاف ایف آئی آر درج کی گئی ہے۔
AFCO سٹیل کی 'غیر قانونی تعمیر'
ایک سینئر اہلکار نے TFT کو بتایا کہ یہ واضح ہے کہ یہ صنعتی یونٹ ضروری ریگولیٹری منظوری کے بغیر غیر قانونی طور پر قائم کیا گیا تھا ۔ اس وقت کے کسی طاقتور سرکاری عہدیدار کی شمولیت کے بغیر اس صنعتی یونٹ کی تعمیر ممکن نہیں۔
اے سی ای کی تحقیقات سے واقف ذرائع نے مزید بتایا کہ جن افسران یا افراد نے سابق وفاقی وزیر کی سہولتکاری کی اور اور قواعد و ضوابط کی خلاف ورزی کرتے ہوئے ان کی مدد کی۔ انہیں بھی تفتیش کا حصہ بنایا جائے گا اور ان سہولت کاروں سے آہنی ہاتھوں سے نمٹا جائے گا۔
اسسٹنٹ کمشنر فیروز والا نے سفارش کی کہ اے ایف سی او سٹیل ملز کے ساتھ ساتھ اس عرصے کے دوران اس کے معاملات میں ملوث اعلیٰ سرکاری افسران کی بھی انکوائری کرائی جائے تاکہ اس معاملے کی ذمہ داران کا تعین کیا جا سکے۔
اسسٹنٹ کمشنر فیروز والا نے یہ بھی سفارش کی کہ مجرموں کے خلاف انسداد بدعنوانی قوانین اور دیگر قابل اطلاق قوانین کی متعلقہ دفعات کے تحت ضروری مقدمات درج کیے جائیں۔
اسی مناسبت سے پنجاب اینٹی کرپشن نے حماد اظہر کے خلاف ایف آئی آر درج کی ہے۔ باوثوق ذرائع نے تصدیق کی ہے کہ سابق وفاقی وزیر اور پی ٹی آئی رہنما حماد اظہر کو جلد گرفتار کر لیا جائے گا۔
AFCO سٹیل کو 250 ناکارہ LTC بسیں موصول ہوئیں
پنجاب اینٹی کرپشن کے ایک سینئر اہلکار نے TFT کو تصدیق کی کہ حماد اظہر کے خلاف ایک اور انسداد بدعنوانی تحقیقات جاری ہے۔
دستیاب شواہد کے مطابق لاہور ٹرانسپورٹ کمپنی (LTC) کی 250 ناکارہ بسیں حماد اظہر کی AFCO سٹیل کو بغیر پیمائش یا وزن کیے 600,000 روپے کے مستقل ریٹ پر دی گئیں۔ یہ قائم کردہ قواعد و ضوابط کی بھی خلاف ورزی ہے اور حماد اظہر کی اس بدعنوانی کی سکیم کی مکمل حد اور مالی قدر کا پتہ لگانے کے لیے مزید تحقیقات جاری ہیں۔
سیاسی انتقام کے سوا کچھ نہیں
دی فرائیڈے ٹائمز (ٹی ایف ٹی) سے خصوصی گفتگو کرتے ہوئے، پی ٹی آئی کے سیکرٹری جنرل برائے وسطی پنجاب حماد اظہر نے کہا کہ AFCO سٹیل مل ان احاطے پر 25 سال سے زیادہ عرصے سے موجود ہے۔ حماد نے زور دے کر کہا کہ اندر کے تمام یونٹ متعلقہ کلیئرنس اور قانونی طریقہ کار کے بعد بنائے گئے ہیں۔
انہوں نے مزید کہا کہ 2018 کے بعد اس احاطے میں کوئی نیا یونٹ تعمیر نہیں کیا گیا۔ اس کا مطلب یہ ہے کہ بطور حکومتی وزیر ان کے دور میں ان کی سٹیل مل میں کوئی تعمیراتی کام نہیں ہوا۔
حماد اظہر نے واضح طور پر یہ بھی کہا کہ انہوں نے کبھی کوئی بسیں نہیں خریدیں۔ یہ محض مسلم لیگ ن کا جعلی پروپیگنڈہ ہے۔
حماد نے افسوس کا اظہار کرتے ہوئے کہا کہ یہ سیاسی انتقام کے سوا کچھ نہیں جو ہو رہا ہے۔
https://twitter.com/HassanNaqvi5/status/1669667319356747777?s=20