ڈارون میں کھیلے گئے پہلے چار روزہ میچ میں سری لنکا اے اور آسٹریلیا اے کے درمیان دلچسپ مقابلے کے بعد میچ بغیر کسی نتیجے کے ختم ہو گیا۔ سری لنکا اے کی جانب سے نوجوان بلے باز نُوانیدو فرنینڈو نے ناقابلِ شکست سنچری اسکور کر کے اپنی ٹیم کو شکست سے بچا لیا۔
سری لنکا اے نے چوتھے روز شاندار بلے بازی کرتے ہوئے اپنی دوسری اننگز 3 وکٹوں کے نقصان پر 280 رنز پر ختم کی۔ فرنینڈو نے ذمہ داری کا مظاہرہ کرتے ہوئے 104 رنز کی ناقابلِ شکست اننگز کھیلی۔ ان کا بھرپور ساتھ پاون رتھناایکے اور پاسندُو سوریہ بندارا نے دیا، جنہوں نے بالترتیب 56، 56 رنز بنائے۔
آسٹریلیا اے کی جانب سے لیام اسکاٹ نے دوسری اننگز میں 10 اوورز میں صرف 10 رنز دے کر ایک وکٹ حاصل کی اور اپنی نپی تلی بولنگ سے متاثر کیا۔
اس سے قبل آسٹریلیا اے نے اپنی پہلی اننگز میں 486 رنز کا بڑا مجموعہ بنایا۔ نیتھن مک سوینی اور لیام اسکاٹ دونوں نے 94، 94 رنز بنائے، جبکہ جوش فلپے (85)، مچل پیری (61) اور جیک ویترالڈ (54) نے بھی اہم کردار ادا کیا۔
سری لنکا کے اسپنر سونل دینوشا نے 97 رنز دے کر 4 وکٹیں حاصل کیں جبکہ فاسٹ بولر پرمود مادوشن نے 82 رنز دے کر 3 کھلاڑیوں کو آؤٹ کیا۔
جواب میں سری لنکا اے نے پہلی اننگز میں 272 رنز بنائے، جس میں سونل دینوشا کی جانب سے 105 رنز کی شاندار ناقابلِ شکست اننگز قابلِ ذکر رہی۔ آسٹریلیا اے کی طرف سے لیام اسکاٹ (2/27) اور ہنری تھورنٹن (2/31) نے عمدہ بولنگ کا مظاہرہ کیا۔
دونوں ٹیموں کے درمیان دوسرا چار روزہ میچ اتوار سے شروع ہوگا۔