دنیا بھر کے نوجوان فری لانسنگ ویب سائٹس پر اپنی صلاحیتوں اور ہنر کے ذریعے لاکھوں کروڑوں روپے کما رہے ہیں۔ لاہور کے ایک نوجوان نے بھی انوکھا کاروبار شروع کر کے اپنی آمدن شروع کر دی ہے۔
لاہور سے تعلق رکھنے والے نوجوان ولید عارفین نے فری لانسنگ کی ویب سائٹ پر اشتہار دیا ہے کہ وہ کسی بھی خواہش مند کے لئے داتا دربار پر دعا کر سکتے ہیں۔ ولید نے اپنے اشتہار میں 3 پیکجز کی پیشکش کی ہے۔
پہلے پیکج میں داتا دربار پر صرف دعا کرنا ہے۔ دوسرے پیکج میں دعا کے ساتھ دیا یا چراغ جلانا ہے، جبکہ تیسرے پیکج میں لنگر تقسیم کرنا ہے۔
تینوں پیکجز کی قیمت بالترتیب 25، 45 اور 100 ڈالر ہے۔ ولید عارفین کا کہنا ہے کہ انہوں نے یہ کام بیرون ملک مقیم پاکستانیوں کے لئے شروع کیا ہے جو کسی وجہ سے پاکستان نہیں آسکتے، لیکن کسی نہ کسی بزرگ کے سلسلے سے ان کا تعلق ہے اور ان بزرگان دین کے دربار پر مانگی جانے والی منتوں اور دعاؤں پر یقین رکھتے ہیں۔
انہوں نے بتایا کہ صرف داتا دربار ہی نہیں بلکہ لاہور میں موجود دیگر مزارات پر بھی اگر کوئی دعا کروانا چاہے تو وہ ان کا یہ کام کر دیں گے۔
ولید عارفین کا کہنا تھا کہ وہ فی سبیل اللہ بھی کسی کے لئے دعا کرسکتے ہیں تاہم ان کی طلب شدہ رقم ان کے سفری اخراجات کے لئے ہے۔
دلچسپ بات یہ ہے کہ عارفین ولید کو اب تک 15 سے زائد آرڈرز موصول ہو چکے ہیں اور انہیں امید ہے کہ ان کا یہ تجربہ کامیاب ٹھہرے گا۔
