میڈیا پر چلنے والی خبروں کے مطابق عدالت نے صحت کی بنیاد پر آصف علی زرداری کو کراچی منتقل کرنے کی درخواست مسترد کر دی ہے تاہم پیپلز پارٹی کی رہنماء روبینہ خالد نے ایک بیان میں کہا ہے کہ ان خبروں میں کوئی سچائی نہیں ہے، زرداری صاحب نے طبی بنیادوں پر کراچی منتقل کرنے کی کوئی درخواست نہیں دی تو درخواست مسترد ہونے کا سوال ہی پیدا نہیں ہوتا۔
ان کا کہنا تھا کہ ہم نے صرف ذاتی معالج کی فراہمی کے لیے درخواست دی تھی جس پر کل فیصلہ آئے گا۔
اس سے قبل آصف علی زرداری کے وکیل لطیف کھوسہ نے کہا کہ آصف زرداری نے حکومت سے پہلے بھیک مانگی ہے، نہ اب مانگیں گے۔
عدالت نے آصف زرداری اور ان کی ہمشیرہ فریال تالپور کے جوڈیشل ریمانڈ میں 26 نومبر تک توسیع کرتے ہوئے ملزمان کو 26 نومبر کو دوبارہ پیش کرنے کا حکم دیا۔
