پاکستان میں احمدی کمیونٹی سے تعلق رکھنے والے افراد پر ظلم و ستم کا سلسلہ جاری ہے۔ تازہ ترین پیش آنے والے ایک واقعے میں ضلع فیصل آباد میں احمدیوں کے قبرستان میں گھس کر قبروں کو نقصان پہنچایا گیا جبکہ دوسرے واقعے میں ضلع سیالکوٹ میں احمدی خاتون کی میت کو مقامی قبرستان میں دفنانے کی اجازت نہیں دی گئی اور خاندان کو 250 کلومیٹر دور ربوہ جا کر میت کی تدفین کرنی پڑی۔
تفصیلات کے مطابق 22 جنوری کی آدھی رات کو کچھ نامعلوم شرپسندوں نے ضلع فیصل آباد کے چک نمبر 89 ج ب رتن میں احمدیوں کی قبروں کی بے حرمتی کی۔ شر پسند عناصر خاردار تاریں کاٹ کر احمدی قبرستان میں داخل ہوئے اور قبروں پر توڑپھوڑ کی۔ اس کے بعد انہوں نے تابوتوں اور کچھ دیگر اشیا کو نذر آتش کرنے کی کوشش کی۔
اسی قبرستان میں 20 نومبر 2022 کو بھی ایسی ہی نوعیت کا ایک واقعہ پیش آیا تھا جہاں نامعلوم شرپسندوں نے 3 قبروں کے پتھروں کو توڑ دیا تھا۔ واقعے کی اطلاع پولیس کو دی گئی مگر پولیس نے ایف آئی آر درج نہیں کی۔
21 جنوری 2023 کو ضلع سیالکوٹ کے چک پیرو میں ایک اور افسوس ناک واقعہ پیش آیا جہاں ایک 75 سالہ احمدی خاتون وفات پا گئیں تو مقامی مشترکہ قبرستان میں ان کی تدفین میں رکاوٹ کھڑی کر دی گئی۔ اس واقعے میں بھی پولیس نے حسب روایت احمدیوں کو مجبور کیا کہ میت کہیں اور لے جا کر دفن کر دیں۔ جس پر اس خاتون کی تدفین 250 کلومیٹر دور واقع ربوہ کے قبرستان میں جا کر کرنا پڑی۔
پاکستان کے مختلف علاقوں سے پچھلے کچھ عرصے میں بار بار احمدیوں کی قبروں کی بے حرمتی کی اطلاعات آ رہی ہیں اور بعض واقعات میں یہ بے حرمتی پولیس کی موجودگی میں بھی سرانجام پاتی رہی ہے۔ ان واقعات کے مجرموں کو کسی قسم کی سزا نہیں دی جاتی۔
یاد رہے کہ پاکستان میں احمدی برادری سے تعلق رکھنے والے افراد پر حملوں اور ان کی عبادت گاہوں کو نقصان پہچانے کے واقعات میں پچھلے کچھ عرصے سے کافی اضافہ دیکھنے میں آ رہا ہے۔
18 جنوری کو چند شرپسند افراد مارٹن روڈ کراچی پر واقع جماعت احمدیہ کی عبادت گاہ میں سیڑھی لگا کر داخل ہو گئے اور انہوں نے سامنے کے دو میناروں کو نقصان پہنچایا ۔
دسمبر 2022 میں گوجرانوالہ کے علاقے باغبانپورہ میں احمدی عبادت گاہ کے دو مینار مسمارکر دیے گئے تھے۔ اس واقعے پر احمدی کمیونٹی کے افراد نے الزام عائد کیا تھا کہ پولیس نے اپنی زیر نگرانی یہ کام کروایا ہے۔ اس سے ظاہر ہوتا ہے کہ ریاست بھی ان شرپسند عناصر کا ساتھ دے رہی ہے۔
اسی طرح اپریل 2022 میں مظفر گڑھ کے علاقے چوک سرور میں مشتعل ہجوم نے پولیس کی موجودگی میں احمدی عبادت گاہ کے مینار اور محراب مسمار کر دیے تھے اور پولیس تماشائی بن کر دیکھتی رہی۔
2019 میں سیالکوٹ کے چھتی بازار میں واقع احمدیہ کمیونٹی کی عبادت گاہ کو مسمار کیا گیا تھا۔ تحریک لبیک اور دیگر مذہبی تنظیموں نے مل کر عبادت گاہ کو مسمار کیا تھا۔
جماعت احمدیہ کے قبرستانوں اور عبادت گاہوں کو مسلسل نقصان پہنچائے جانے کے واقعات میں اضافہ تشویش ناک ہے اور اس معاملے پر ریاست کی خاموشی پر ایک سوالیہ نشان ہے۔
