وفاقی وزیر اطلاعات فواد چوہدری کا کہنا ہےکہ انتہا پسند جماعت سے اتحادکا مطلب عالمی سطح پر تنہائی ہے، انتہا پسند جماعتیں سیاست میں بہتر کردار ادا کرنے کے بجائے انتشار پھیلاتی ہیں، ایسی جماعتوں کی سیاست میں شرکت محدود ہوتی ہے۔
سوشل میڈیا پر ایک ٹوئٹ کے ردعمل میں فواد چوہدری کا کہنا تھا کہ ایک وقت تھا جب سنی تحریک، تحریک لبیک پاکستان (ٹی ایل پی) سے زیادہ پرتشدد تھی ، وقت کے ساتھ ایسی جماعت کا خاتمہ ہوجائےگا۔
https://twitter.com/fawadchaudhry/status/1455384392059310085
ایک اور ٹوئٹ میں وزیر اطلاعات نے میڈیا کےکردار کی تعریف کرتے ہوئےکہا کہ حالیہ بحران میں پاکستان کے مین اسٹریم میڈیا نے ذمہ داری اور احتیاط کا مظاہرہ کیا، اگر میڈیا ایسے بحرانوں میں ذمہ داری کا مظاہرہ نہ کرے تو حکومتوں کی مشکلات بڑھ سکتی ہیں۔
https://twitter.com/fawadchaudhry/status/1455397057557053442
دوسری جانب تحریک انصاف وسطی پنجاب کے صدر سینیٹر اعجاز احمد چوہدری کا کہنا ہےکہ کالعدم تحریک لبیک کے ساتھ حکومتی معاہدہ خوش آئند ہے، پر امید ہوں کہ جلد ہی معاہدہ پایہ تکمیل پرپہنچےگا۔ انہوں نے کہا کہ پاکستان تحریک انصاف نے الیکشن میں کالعدم ٹی ایل پی کیساتھ چلنے کا عندیہ دے دیا۔
جیو نیوز سےگفتگو کرتے ہوئے اعجاز چوہدری کا کہنا تھا کہ سعدرضوی کی رہائی پر گلدستہ لےکر ملاقات کے لیے جاؤں گا،کالعدم تحریک لبیک سے سیاسی معاملات پر گفتگو جلد شروع کریں گے۔
