انسپکٹر جنرل پنجاب پولیس نے آج سی سی پی او آفس میں بلال صدیق کمیانہ کے ساتھ سکیورٹی میٹنگ کی ہے جو ایک واضح پیغام ہے کہ غلام محمود ڈوگر محض عمران خان، پی ٹی آئی اور پرویز الہیٰ کے لئے سی سی پی او ہوں گے جبکہ عملی طور پر سی سی پی او بلال صدیق کمیانہ ہی ہیں۔ یہ کہنا ہے صحافی مبشر بخاری کا۔
نیا دور ٹی وی کے ٹاک شو 'خبر سے آگے' میں گفتگو کرتے ہوئے انہوں نے کہا کہ سپریم کورٹ نے غلام محمود ڈوگر کیس کے فیصلے میں لکھا ہے کہ اگر کسی تقرر یا تبادلے پر الیکشن کمیشن آف پاکستان کے چاروں صوبائی نمائندے متفق ہو جائیں تو اس کی اجازت ہے۔ آنے والے دنوں میں الیکشن کمیشن کے یہ چاروں نمائندے بلال صدیق کمیانہ کی بطور سی سی پی او لاہور تقرری پر متفق ہو جائیں گے اور یوں بلال صدیق کمیانہ ہی سی سی پی او لاہور ہوں گے۔
صحافی احسان اللہ ٹیپو نے کہا کہ سول حکومت اور عسکری ادارے تحریک طالبان پاکستان کے حملوں کے جواب میں پریشان دکھائی دیتے ہیں۔ انہیں سمجھ ہی نہیں آ رہی کہ کیا کیا جائے۔ ہماری ریاست نے اندازہ لگایا تھا کہ افغانستان میں جب طالبان کی حکومت آئے گی تو افغانستان پاکستان کر سرحد پر موجود سکیورٹی کا خطرہ کسی حد تک کم ہو جائے گا اور ٹی ٹی پی بھی قابو میں آ جائے گی۔
تجزیہ کار فوزیہ یزدانی نے کہا کہ الیکشن کمیشن نے بہت محتاط رویہ اختیار کیا ہے تاہم صدر پاکستان کو چاہئیے تھا کہ وہ اپنے خط میں شائستگی کا مظاہرہ کرتے۔ عمران خان کی جان کی حفاظت کرنا ریاست کی ذمہ داری ہے مگر عمران خان کو بھی احتیاط کا مظاہرہ کرنا چاہئیے۔
پروگرام کے میزبان رضا رومی اور مرتضیٰ سولنگی تھے۔ 'خبر سے آگے' ہر پیر سے ہفتے کی شب 9 بج کر 5 منٹ پر نیا دور ٹی وی سے براہ راست پیش کیا جاتا ہے۔
