سپریم کورٹ کے چیف جسٹس عمر عطا بندیال نے جسٹس قاضی فائز عیسیٰ اور جسٹس سردار طارق مسعود کے خطوط کے بعد جوڈیشل کمیشن کے اجلاس کی آڈیو ریکارڈنگ پبلک کردی ہے۔
اس سے قبل سپریم کورٹ کی جانب سے جاری پریس ریلیز میں کہا گیا ہے کہ چیف جسٹس عمر عطا بندیال نے جوڈیشل کمیشن اجلاس کی آڈیو ریکارڈنگ جاری کرنے کی ہدایت کر دی ہے جو سپریم کورٹ کی ویب سائٹ پر جاری کی جائے گی۔
ترجمان سپریم کورٹ کی جانب سے جاری پریس ریلیز میں کہا گیا ہے کہ جوڈیشل کمیشن کے اجلاس میں جسٹس فائز عیسیٰ اور جسٹس سردار طارق نے اعلامیے سے اختلاف کیا۔ معزز ججز کے اختلاف کے باعث چیف جسٹس نے آڈیو ریکارڈنگ جاری کرنے کی ہدایت کی۔
Breaking:
Supreme Court has issued another clarification which says that Attorney General for Pakistan Ashtar Ausaf had stated in JCP meeting that matter regarding four SC judges appointment should be deferred to frame the appropriate rules about judges appointment. pic.twitter.com/lzsp7UE2j8— Hasnaat Malik (@HasnaatMalik) July 29, 2022
پریس ریلیز میں کہا گیا ہے کہ آڈیو ریکارڈنگ کے ایک گھنٹہ 29 منٹ سے ایک گھنٹہ 38 منٹ تک اٹارنی جنرل کی گفتگو ہے۔ اٹارنی جنرل نے رولز بننے تک ججز تعیناتی کا معاملہ موخر کرنے کی بات کی۔
سپریم کورٹ کی پریس ریلیز میں کہا گیا ہے کہ اٹارنی جنرل نے میرٹ پر کسی نامزدگی کی حمایت یا مخالفت نہیں کی۔ کمیشن کے 5 ارکان نے کل ہونے والا اجلاس موخر کرنے کی حمایت کی تھی۔
چیف جسٹس کا طرز عمل غیر جمہوری، اکثریت نے 4 ججوں کی نامزدگیوں کو مسترد کیا: جسٹس طارق مسعود کا خط
خیال رہے کہ ججوں کی تعیناتی بارے جسٹس قاضی فائز عیسیٰ کے خط کی بازگشت ابھی جاری تھی کہ اس کی توثیق کرتے ہوئے ایک اور معزز جج جسٹس سردار طارق مسعود نے بھی خط لکھتے ہوئے چیف جسٹس عمر عطا بندیال کے طرز عمل کو غیر جمہوری قرار دیدیا ہے۔
جسٹس سردار طارق مسعود نے اپنے خط میں سپریم کورٹ کی پریس ریلیز کو مسترد کرتے ہوئے کہا ہے کہ پانچ ارکان کی اکثریت نے چیف جسٹس عمر عطا بندیال کی جانب سے 4 ججوں کی نامزدگیوں کو مسترد کر دیا تھا۔
جسٹس سردار طارق مسعود کی جانب سے خط چیف جسٹس اور جوڈیشل کمیشن کے ارکان کو لکھا گیا ہے۔ انہوں نے خط میں انکشاف کیا کہ جوڈیشل کمیشن اجلاس شروع ہوا تو چیف جسٹس نے اپنے نامزد کردہ ججوں کے بارے میں بتایا تو جسٹس ریٹائرڈ سرمد جلال عثمانی نے 4 ججوں کے حق میں جبکہ ایک جج کی تقرری کیخلاف رائے دی۔ تاہم جسٹس سجاد علی شاہ اور جسٹس اعجاز الاحسن نے چیف جسٹس کے ناموں کی منظوری دی۔
جسٹس سردار طارق مسعود نے خط میں لکھا کہ میں نے بھی اپنی رائے دیتے ہوئے اسلام آباد ہائیکورٹ کے چیف جسٹس اطہر من اللہ کی سپریم کورٹ میں تقرری کا کہا۔
انہوں نے خط میں لکھا کہ جوڈیشل کمیشن کے اجلاس کے دوران میں نے بھی سندھ ہائیکورٹ کے 3 جبکہ لاہور ہائیکورٹ کے ایک جج کی نامزدگی کو نامنظور کیا اور کہا کہ جسٹس اطہر من اللہ سینئر ترین جج ہیں۔ اس پر وزیر قانون، اٹارنی جنرل اور بار کونسل کے نمائندے نے اس سے اتفاق کرتے ہوئے 4 نامزد ججوں کی تقرری نامنظور کی۔
جسٹس سردار طارق مسعود نے خط میں انکشاف کیا کہ جسٹس فائز عیسیٰ نامنظوری کی وجوہات بتا رہے تھے کہ اس دوران چیف جسٹس نے انتہائی غیر جمہوری عمل کا مظاہرہ کیا اور اجلاس سے ہی اٹھ کر چلے گئے۔
جسٹس طارق مسعود کا کہنا تھا کہ معاملہ واضح ہو گیا تھا کہ جوڈیشل کمیشن کے 5 ارکان نے نامزدگیوں کو نامنظور کر دیا تھا تاہم اس کے بعد سپریم کورٹ کی جانب سے جو پریس ریلیز جاری کی وہ حقائق کے برعکس ہے۔ یہ اجلاس 3 گھنٹے جاری رہا لیکن کسی نے بھی موخر کرنے کا نہیں کہا۔ سپریم کورٹ ترجمان جوڈیشل کمیشن ممبر ہے نہ سیکرٹری۔ چیف جسٹس فوری طور پر جوڈیشل کمیشن اجلاس کے درست منٹس جاری کریں۔ جوڈیشل کمیشن کے تفصیلی منٹس پبلک کرنے سے ہی افواہوں کا خاتمہ ہوگا۔
جسٹس قاضی فائز عیسیٰ کا خط
جمعرات کو ہونے والے سپریم جوڈیشل کمیشن کے اس اجلاس کے بعد جسٹس قاضی فائز عیسیٰ کا ایک خط بھی سامنے آیا تھا جو کہ انھوں نے چیف جسٹس عمر عطا بندیال کے علاوہ اس کمیشن کے دیگر ارکان کو تحریر کیا۔
جسٹس قاضٰ فائز عیسیٰ کے اس خط میں کہا گیا ہے کہ ان کے علاوہ جسٹس سردار طارق مسعود، وزیر قانون، اٹارنی جنرل کے علاوہ پاکستان بار کونسل کے رکن نے چیف جسٹس کی طرف سے پیش کیے گئے چار ججز کے نام مسترد کر دیے ہیں ان میں سندھ ہائی کورٹ کے تین جبکہ لاہور ہائی کورٹ کا ایک جج شامل ہے۔
خط کے مطابق پشاور ہائی کورٹ کے چیف جسٹس نہ تو سینئیر جج یا اور نہ ہی ملک کی دیگر ہائی کورٹس کے دیگر چیف جسٹس صاحبان سے سینئیر ہیں، اس لیے فیصلہ کیا گیا کہ اس بارے میں مزید معلومات اور دیگر ہائی کورٹس کے چیف جسٹس صاحبان کا ڈیٹا بھی طلب کیا جائے گا۔
اپنے خط میں جسٹس قاضی فائز عیسیٰ کا کہنا تھا کہ اجلاس کے دوران چیف جسٹس نے اپنے فیصلے ڈکٹیٹ نہیں کروائے اور جلدی میں اجلاس چھوڑ کر چلے گئے جبکہ ان کے پیچھے جسٹس اعجاز الااحسن بھی اجلاس سے چلے گئے۔ انھوں نے کہا کہ عوام کی نظریں جوڈیشل کمیشن کے اجلاس پر تھیں اور یہ ان کا آئینی حق ہے کہ انھیں معلوم ہو کہ اجلاس میں کیا فیصلے ہوئے۔
جسٹس قاضی فائز عیسیٰ کی طرف سے اس بات پر زور دیا گیا کہ سپریم جوڈیشل کمیشن کے سیکرٹری جو آج کل چھٹیوں پر ہیں، ان کی جگہ قائم مقام سیکرٹری مقرر کیا جائے، جو اس اجلاس کے منٹس لکھ کر میڈیا کے ذریعے عوام کو آگاہ کریں۔
خیال رہے کہ جسٹس قاضی فائز عیسیٰ کی طرف سے اس سے قبل بھی 25 جولائی کو چیف جسٹس کو خط لکھ کر درخواست کی گئی تھی کہ چونکہ وہ بیرون ملک ہیں اس لئے سپریم جوڈیشل کمیشن کے اجلاس کو کچھ دنوں کے لئے ملتوی کر دیا جائے تاہم ان کی اس استدعا کو منظور نہیں کیا گیا تھا۔
جوڈیشل کمیشن کے اس اجلاس میں شریک رکن کے مطابق اٹارنی جنرل اشتر اوصاف جو کہ بیرون ملک تھے اور وطن واپس آرہے تھے، اس اجلاس کا سن کر وہ بھی لندن میں رک گئے اور سکائپ کے ذریعے اس اجلاس میں شریک ہوئے۔
اجلاس میں اکثریت نے بھی اس تجویز سے اختلاف کیا کہ سپریم کورٹ کے کسی جج کی ریٹائرمنٹ سے پہلے ہی ان کی جگہ کسی دوسرے جج کے تعینات کرنے کے لئے کسی جج کے نام پر غور کیا جائے۔
جسٹس قاضی فائز عیسیٰ نے بھی اپنے اس خط میں اس بات کا ذکر کیا کہ ملکی آئین اس بات کی اجازت نہیں دیتا کہ کسی شخص کی ریٹائرمنٹ سے پہلے ہی اس جگہ کو فل کرنے کے لیے کسی کے نام کو زیر بحث لایا جائے۔
وکلا تنظیمیں بھی اس بات کا مطالبہ کرتی آ رہی ہیں کہ اعلی عدلیہ میں ججز کی تعیناتی میں سنیارٹی کو اہمیت دی جائے اور اس کے علاوہ چیف جسٹس کے پاس جو نام پیش کرنے کا استحقاق ہے وہ واپس لیا جائے۔
