وزیراعظم عمران خان نے سندھ میں وفاقی اداروں کے ذریعے ایکشن پلان شروع کرنے کا فیصلہ کرلیا۔
وزیراعظم عمران خان کی زیر صدارت سندھ اسٹریٹجی کمیٹی کا اجلاس ہوا جس میں گورنر سندھ عمران اسماعیل، شاہ محمود قریشی، اسد عمر، حلیم عادل شیخ ، چیف آرگنائزر سیف اللہ نیازی، عامر کیانی اور سیف اللہ ابڑو نے شرکت کی۔
اجلاس میں سندھ کی سیاسی اور انتظامی صورتحال پر تفصیلی مشاورت کی گئی اور سندھ میں پی ٹی آئی کے متحرک کردار پر بھی غور کیا گیا۔
اجلاس میں وفاقی اداروں کے ذریعے ایکشن پلان شروع کرنے کا فیصلہ کرتے ہوئے طے پایا کہ اسمگلنگ، منشیات اور بد انتظامی کی روک تھام کیلئے وفاقی حکومت کردار ادا کرے گی، جب کہ وزیراعظم بھی جلد سندھ کا دورہ کریں گے۔
دوسری جانب وزیر اعظم عمران خان سے سندھ سے تعلق رکھنے والے اراکین قومی و صوبائی اسمبلی نے ملاقات کی جس میں صوبے کی مجموعی صورتحال خصوصا امن و امان اور کورونا کی صورتحال اور عوام کو درپیش مسائل پر بات چیت. ہوئی۔
اس کے علاوہ سندھ میں وفاق کے جاری ترقیاتی منصوبوں خاص طور پر صوبہ سندھ کے پہلے بڑے ٹرانسپورٹ منصوبے گرین لائن پر پیش رفت پر گفتگو ہوئی. وزیر اعظم نے گرین لائن کی متعین شدہ مدت میں تکمیل کو یقینی بنانے اور سندھ پیکیج کے تحت منصوبوں پر بھی تیزی سے کام کرنے کی ہدایات جاری کیں۔
سندھ کابینہ میں تبدیلیوں کا فیصلہ،بڑے برج ہلنے کا امکان
سندھ کابینہ میں تبدیلیوں کا فیصلہ کرلیا گیا جس کے بعد پیپلز پارٹی میں صلاح مشورے شروع ہوگئے ہیں۔ ذرائع کے مطابق وزیر اعلیٰ سندھ مراد علی شاہ نے کابینہ ارکان اور ممبران سندھ اسمبلی سے الگ الگ ملاقاتیں کی ہیں۔ ذرائع بتاتے ہیں کہ سندھ کابینہ میں ایک دو روز میں ردو بدل کا امکان ہے جبکہ کابینہ میں نئے چہرے شامل کیے جائیں گے۔ ذرائع کے مطابق سہیل انورسیال، اسماعیل راہو، نثار کھوڑو اور ہری رام کشوری لال سے وزارت لیے جانے کا امکان ہے۔
ذرائع کا کہنا ہے کہ منظور وسان، جام خان شورو، ریاض شیرازی اورساجد جوکھیو کو کابینہ میں شامل کیے جانے کا امکان ہے۔
